香港銀行唔加息住，呢個表面利好嘅消息，對部份炒家嚟講，可能又係另一次短炒嘅良機，始終每個投資者心中都有一盤數，計得掂數、負擔得嚟，咩嘢時勢都有投資機會。利嘉閣馮樹勳報料，大角嘴維港灣啱啱有單連租約嘅刁，賣方肯畀到半年嘅特長成交期，買方就擺明車馬話，睇好個市，有信心半年內摸出賺錢。
先講買家心態，佢認為後市向好，即使用583萬較高價入市，仍然有水位，況且賣家肯畀到半年成交期，認為大把時間可以賺價摸售。至於點解賣方會咁疏爽？原來佢99年一手買入價只係473萬元，一直放租，投入嘅成本有限，今次有個炒家肯以高價接手，賬面已經賺110萬，加上個單位收緊2萬銀月租，未來半年仲可以袋多12萬，點計都有着數。
個單位係9座中層A室，982呎，望海景，呎價5937。今個月維港灣有20宗成交，平均呎價5368。