祖雲達斯打假波案件到目前為止都未有定案，但隊中嘅捷克中場尼維特就已經表白，若祖雲達斯真係被判罰降班，都願意同球會共同進退，幫「祖記」打上甲組行列先至考慮退隊。尼維特仲話曾經同隊友迪比亞路、保方傾過前途問題，前者話會留隊，但後者多數會離開，另覓新方向。其實以尼維特嘅名氣同實力，佢仲想幫或者會降班嘅祖雲達斯打江山，都算係有情有義囉。