菠蘿文：最後一場4強賽啦！法國對葡萄牙，我就寧捧當頭起嘅「法記」喇。
侍仔：法國入到4強係一個諷刺，老馬掂過後生仔。
肥牛：嘿！等你哋睇下咩嘢叫做真正嘅球王！施丹先至係王者！！法國過到巴西呢關，冠軍一定係佢哋啦！球王係無分年齡，係掂就掂。
招積域：施丹真係返咗嚟啦，連杜林都話𠵱家隊入面氣氛團結，同98年捧盃嗰陣有啲相似。
吹水傑：再度重遇你……難為巴西班球員，事隔8年再次受辱，搭飛機返屋企都要後門走，細哨個銅像重俾人放火燒埋，名譽掃地。
費迪高：其實葡萄牙今場可以和到波㗎，迪高同哥斯天拿復出，費高同施丹又係前隊友，大家咁熟路，一於嚟番場「老球王重聚」。
招積域：和波之後又射12碼？咁葡萄牙咪啱晒？但我唔想再睇呢啲足球啦，撲12碼係好睇，但我更想睇90分鐘內嘅精采撲救囉。
吹水傑：你想還想，入波向來都唔係葡萄牙前鋒嘅責任，保列達今屆入得1球咁多，巴夫斯可以擔張沙灘椅喺龍門口坐，曬吓太陽。
費迪高：講下又似呀，上場睇葡萄牙同英格蘭，兩隊都好似淨係斬斬斬，只識製造緊張氣氛，即係變相「打假波」，所以我覺得佢哋唔會有波入，有迪高又點？法國有馬基列尼，掃晒你啲波。
吹水傑：葡萄牙都危危哋，亨利同列貝利愈踢愈有信心，希望「大菲」之前話增強球員信心係有用啦！我都想費高退休前可以有個世界盃決賽。
文：高洛文