大家作為《金手指》嘅fan屎，一見到個題有「一注獨贏」呢四隻字，都應該知道今日孫柏文會為大家提供一個投資建議。今次會係《金手指》一欄自從日日見大家以來，第四次提供投資建議。
首先，因為《金手指》fan屎界中愈來愈多嘅「信徒級」fan屎，所以為迎合佢哋嘅需要，今次一改作風，唔會先講啲理由同分析，到最後先至講個投資建議，今日會一開始就篤個投資建議出來。
建議買入：恒指熊證6204
目標價：揸到「蘋果日報散戶指數」出現「-17」或者到期日
年期：熊證到期日2006年12月28日
買呢隻恒指熊證嘅原因，當然係我覺得我哋特區嘅股市會跌、跌、跌。而股市跌就主要有兩個原因。第一係花旗國聯儲局會繼續加息，第二係日本中央銀行會繼續大力抽水走，呢兩個因素一拍埋，就會製造一個叫做「完美風暴」畀各位股民歎。
聯儲局會繼續加息嘅原因，唔係因為聯儲局主席伯南克同股市有仇，我相信佢老人家其實係好想今日已經可以宣布停止加息，不過因為通脹數據將會好差，所以佢會冇選擇咁繼續加息。大家可能會問：「花旗國樓市唔係爆緊煲咩？我哋特區當年被解放之後，樓市爆煲唔係令到通縮出現？如果有通縮，聯儲局點解會加息？唔通樓市爆煲係會令到通脹惡化？」真聰明！因為花旗國通脹率計算方法，有超過四成嘅比重係租金升跌幅。
日本央行繼續抽水
呢幾年來喺花旗國，好多唔應該買樓「掹車邊」嘅人，因為低息所以入咗市，所以好多租務物業嘅租金都有大幅下調，彌補咗其他嘢嘅價格上升，令到通脹率好似冇事。不過，𠵱家花旗國樓市爆煲，呢啲唔應該買樓嘅人亦還唔起錢，要宣布破產、亦被迫遷。迫遷之後，就要租樓住，令花旗國租金開始上升，通脹率上升速度又點會話慢？伯南克仲可以停止加息？股市仲唔跌？
講到日本央行繼續抽水走，大家可能會問：「佢哋唔係已經吸取咗二千年嘅教訓？當年日本有少少經濟起色，佢哋太早、太快加息，咁就令到通縮出現，今次佢哋唔會重蹈覆轍啊？」問得好！不過我要反問大家，點解當年九十年代日本出現咁多問題？原因就係八十年代，日本投資過多，引發惡性競爭，公司賺唔到錢還債，最後日本銀行個個都係有嚴重呆壞賬問題。所以日本央行係好驚日本再一次投資過多，咁啱啱過咗嘅禮拜一，日本商家又再一次表現「非理性亢奮」，話會大力投資，日本央行仲唔大力抽水走？股市仲唔跌？
各位fan屎要聽話，今日要買咗先，因為我怕今晚花旗國已經會覺悟，聽日買怕太遲。聽日我會繼續解釋，點解要買「熊證」同埋解釋我如何得出啲目標價及年期。
孫柏文