今屆世界盃冠軍誰屬仲未知，但另一樣同世界盃有關嘅比賽，就已經名花有主，32名靚女參加嘅世界盃小姐選舉，結果由多哥小姐勝出，都幾令人意外。
慕尼黑嘅EUROPAPARK早前舉辦咗1個「世界盃小姐選舉」，不過參賽嘅32位小姐唔係來自世界各地。雖然佢哋其實全部喺德國度搵返3.0嚟，但同佢哋代表嘅國家，點都有些少關係，佢哋好多都係移民，好似哥斯達黎加、捷克嘅候選人都係呢類case。至於另一種參加者，就好似日本小姐咁，佢爸爸係日本人，佢有一半日本血統，就可以代表日本參賽。
同幾位世界盃小姐傾過，發覺佢哋好多對足球一啲認識都冇，但係哥斯達黎加同捷克小姐就唔同啦，兩位對國家隊嘅認識，相信比好多香港球迷仲要厲害。好似哥國小姐話，佢以前喺國內都有參加過選美，喺1個場合下認識係今屆世盃入咗2球嘅國家隊前鋒雲祖柏，之後仲成為朋友。咁啱我哋香港嘅鄭兆聰當年又喺哥國踢過職業聯賽，有線直擊隊於是問佢識唔識鄭兆聰啦，但佢話對聰仔一啲印象都無……
捷克小姐男友踢德丙
至於捷克小姐，佢識足球嘅原因，係因為佢有位職業足球員男友，雖然踢嘅只係德國丙組球隊，但兩人成日傾有關足球嘅問題，咁自然就對足球有認識啦，當中對捷克同德國足球嘅認識最多。
話說回頭，講番個世界盃小姐選舉先，最後由多哥小姐勝出，但我發覺日本及烏克蘭呢兩位小姐仲靚，唔明白佢哋點解會落選，可能外國人同亞洲人審美眼光唔同吧。
有線06世界盃嘉年華，將於今晚11:30pm——1:30am，播出世盃外景隊採訪滙報
