唔經唔覺世界盃嚟到4強階段，準決賽分開兩日打；鍾意玩過關嘅朋友，只好買隔日飛，不過相信好多波友同小弟一樣，賭完今晚德國對意大利，瞓醒先度星期三葡萄牙對法國嘞。
今晚場準決賽，小弟準備分兩注出擊，一注博德國上盤，一注博入球大；其實德國讓平/半博上盤，有啲反數據。今屆16強淘汰賽起計，3場讓平/半賽事都開下盤，西班牙讓法國、荷蘭讓葡萄牙，甚至波都輸埋。
莊家反數據睇好德國
不過德國係今屆盤神，5場賽事未輸過盤。上仗對阿根廷開平手盤，已經證明莊家未算看好有主場之利嘅德國，結果德國都可以完場前追平，叫做唔使輸盤。再比較番今場對手意大利，論級數阿根廷同意大利差不多，德國可以由上仗平手，轉為讓平/半，明顯莊家已經認同德國實力。講真德國班後生仔，上仗打贏阿根廷，信心已經返晒嚟，亦都相信可以再打入決賽，睇埋德國世界盃未贏過意大利嘅往績，追多次德國上盤。
兩軍前鋒腳風順
另外補多注2.45倍「大」；意大利係8強賽事，唯一開到「大」球隊，上仗對烏克蘭，藍軍自己已經炮製3個入球，前線攻力已經唔係昔日嗰隊悶蛋十字聯防球隊。難得東尼復勇，小弟一早講過，德國後防應付高空波企位有問題，東尼呢場有權再入波。當然主隊攻力亦都可靠，前鋒高路斯再入1球，金靴獎就差不多手到拿來；要留意隊長波歷克到𠵱家都未開齋，唔知佢係留力，定真係腳風唔順，不過波歷克肯定係大賽球員，小弟深信佢呢場有表現。既然兩隊都入波，博埋大都合理。
牽牛