陳太7.1上街全城哄動，去到邊都俾人圍，當中多數係八方同行，事關怕漏料，可惜喺呢啲混亂場面，有人竟然乘機搏懵。
話說喺陳太臨離隊之前，有個電台女實習記者圍緊陳太、扑咪之時，突然發覺自己兩個膊頭都被電視台攝影機壓住，前後都係人，郁都唔郁得，呢個時候，佢感覺有人摸佢patpat，而且仲愈摸愈猖狂，連佢個可以上網嘅手提電話都想偷走。
女記者無計之下，情急起嚟惟有大叫非禮同救命，點知啲行家不單止冇施援手，仲有記者叫佢唔好大嗌，搞到佢哋收唔到陳太把聲，真係全冇同情心。
女記者最終都蝕底晒，唯有向上司訴苦，然後就報警。當佢去報警時，班差人話佢唔係第一個話唔見嘢嘅記者，擺明有人混水摸魚。電台上司事後好勞氣，覺得行家做新聞係緊要，但唔等於見到有人叫救命都唔理。