家吓人人講環保，大企業咁注重形象，就梗係要跟住潮流走。好似美國運通（AE)同恒生咁，就先後用電郵，代替郵寄紙張月結單，一來唔使用咁多紙，砍少幾棵樹，二來畀啲客多個選擇，三來就梗係可以慳番啲郵費開支，正所謂小數怕長計，年中真係慳番唔少！
為咗令班客轉用電子月結單，美國運通就打「方便」牌，只要個客肯轉，除咗可以睇番過去6個月嘅資料，仲可以免費下載，佢哋美國、新西蘭同新加坡等地，一早已經推出呢個新服務，香港同日本就噚日先開始。
至於恒生就仲體貼，事關佢哋出動「獎品」，只要你肯轉用電子月結單，就可以自動參加大抽獎，獎品有iPodnano、數碼相機、DVD、PSP，推廣期到年底，有興趣就上恒生個網睇睇。