高達殺到點算？仲使講梗係拎定銀仔跟機。新人類爆Seed完再爆Seed，激光劍、浮游炮與地球連邦嚟個大決戰！一眾GundamSeed機迷，終於唔使再等喇，佢嘅續集《SeedDestiny》已經登陸香港。動畫入面飛鳥真嘅Destiny，基拉嘅StrikeFreedom全部都會在新遊戲中出現。仲未落場打過嘅，定要嚟個先睹為快！
記者︰陸俊雄 攝影︰黃子偉
ImageBoy&Girl︰William、Amy（Salvador）
鳴謝︰金沙遊戲機（觀塘道410號地庫）
PROFILE
遊戲類型：格鬥
對應機種：街機
遊玩人數：1至4人
每局價錢：$5至$7
儘管舊作《GundamSeed》俾機迷不斷投訴，又話打得太過天花龍鳳，冇深度，又話互相鬥「無限StepCancel」無意思，更話細Cost機體太強唔平衡，《GundamSeed》依舊有大批機迷投幣鬥機！嚟到新作《GundamSeedDestiny》情況更勁，上星期五晚全港得幾間機舖裝咗機，即引嚟大批高達迷圍觀，筆者親歷其境，小小一間舖逼到後面啲人打唔到機！認真唔講得笑。新版落場每局約$5至$7，對人戰幾分鐘就玩完，的確唔平。不過一眾Fans點會冷靜計較值唔值吖，淨係揸部至新嘅StrikeFreedom同無限正義已值回票價！
機迷即場實試
一直愛用紅色Saviour嘅William，今集一試已感到Saviour唔同咗。佢話Saviour變咗飛機後，雖然轉向差咗且速度慢，不過爆Seed後就唔係人咁品，又靈活又快！William仲覺得金色嘅「曉」唔錯，一來能力平均，二來可以反射雷射光，中距離俾人射到可以反射對手，好鬼過癮咁話。
小記玩過今集之後，已經畀Destiny迷住咗，其他人射來射去槍林彈雨之際，Destiny埋身肉博斬到七彩嘅能力，真係叫人拍案叫絕。對於筆者唔鍾意用槍嘅性格，所以一定唔會用StrikeFreedom，格鬥技高嘅機種就最合心意。
大量新機登場
計一計，地球連邦9個、奧布7個、扎多軍有24個，今次足足有40個機動戰士（MS）新登場。乜話全部都係新？冇錯，除咗一眾新加嘅590Cost機種，即使係一啲上集見過嘅熟悉面孔，今集喺招式、攻擊能力、HP值上都有所改變。咁你話係咪全部都係新嘢先？
《GundamSeedDestiny》入面新出現嘅角色飛鳥，依舊Friend底嘅基拉同阿斯蘭，當然會有新高達跟住佢哋出場。「590Cost」高達中最令人矚目嘅一定數到飛鳥嘅Destiny，小記用過後覺得呢隻高達把大劍認真厲害，嚟個昇龍斬，埋身格鬥攞到絕對優勢，中級機同細機遇到佢，幾下玩完勁冇運行！至於基拉嗰部StrikeFreedom，又係一部機迷勢將必練嘅射擊型新高達。呢部機可以儲炮，只要畫面上同時出現2個敵人時，就可以鎖定佢哋，手上2炮齊發，加上自己又有龍騎護體，都咪話唔過癮。
其實全新登場嘅又何止上述2部機，仲有動畫入面雷嘅傳說、阿斯蘭嘅無限正義，同埋卡嘉蓮嘅「曉」﹔至於駕駛員連女角拉克絲都有得揀，機迷見到雙眼肯定發光。
空戰更趨激烈
今集進一步強化空戰，原因係玩家都鍾意起勢爆Seed加Speed，好似阿斯蘭嗰架無限正義咁，可視為空中之王，成架飛機衝埋對手度，或者起勢追人再連射！
另外唔少玩家都話空戰愈來愈似動畫入面嘅氣氛。因為2對2時，4條友仔雷射炮四圍射，就算身影快人哋Lock你唔死，光柱喺高達身邊飛過嗰吓，感覺仍好過癮，有睇過動畫嘅機迷都大叫Enjoy！
爆Seed模式有變
初哥一定要知咩係爆Seed；遊戲入面爆Seed係指MS瞬間爆發特殊能力，好似神功護體咁強攻對手（等同舊作嘅覺醒系統）。不過今集不同，唔只得Rush令機身加防可以起勢衝再連射，仲有Speed同Power2種Seed畀你爆！依筆者場內所見，唔少玩家大讚爆Seed加Speed好用，先衝埋對方度，再狂斬格劍都未遲。
今集爆Seed易咗，因為儲Seed嗰條橙色棒只要儲到一半就可以爆Seed，而且再儲返亦好快，所以唔少玩家愛用590Cost嘅大機屈人。好似Destiny爆Seed加Power，本身把大劍已經好勁，加埋爆閃手威力嚇人，有機會爆Seed兩次，唔通咁仲唔叫屈機？筆者就係咁俾人屈咗幾鋪。
3區DVD重溫動畫
《GundamSeed》及《Destiny》在日本已正式播完，不過一眾高達迷想更為投入高達世界嘅話，不妨考慮代理7月7日返貨嘅《Destiny》3區DVD，暫推出Vol.1至3，至到Vol.13完結。
