甄子丹找來Soler唱電影《龍虎門》插曲，前晚幫二人執導拍MV，教耍高難度雙截棍，更考慮邀請他們拍電影，似乎要力捧孖仔由搖滾音樂人變做打仔。
孖生兄弟組合Soler為電影《龍虎門》唱插曲《生死陣》，前晚由有份拍《龍》片的甄子丹執導拍MV，雷宇揚擔任總策劃。甄子丹將於下月底開拍由古天樂主演的新戲《強戰刑警》，正考慮找Soler演出，他說：「佢哋形象健康，有人氣又靚仔嘛。」
首次執導MV
Soler先拍攝彈結他部份，然後即席表演耍雙截棍，大孖Julio說：「用電影氣氛拍MV，我哋冇拍電影經驗，都幾特別，仲可以跟導演學幾招，學吓喺鏡頭前點打。」Dino則謂有試打幾招給甄子丹過目，獲讚打得不錯，故甚有信心。
甄子丹說：「我第一次做MV導演，唔畀咁大壓力自己啦，會拍得藝術成份好高嘅。我識彈鋼琴，有音樂底，用我啲音樂知識嚟拍，首歌係黃貫中作曲，係首Rock'nRoll歌，本來我想用HipHop，但周杰倫喺《霍元甲》中已經用咗，我唔想好似跟人口水尾咁。」
提到Soler，甄子丹大讚孖仔有個人風格，外形又討好，平時都有聽他們的歌曲，他說：「我會拍出佢哋另一種style，係我建議搵佢哋，我都想搵余文樂唱㗎，不過佢唱片合約有問題。」他謂會為Soler度幾招高難度的雙截棍，並說：「唔難唔好玩。」
採訪：魯萍 攝影：陳俊強
