五六十年代內地成日話要超英趕美，如果純金錢掛帥，𠵱家已經實現一半目標。據世界銀行最新公布，按照佢哋計算，05年中國國民總收入（GNI）達2.26萬億美元，比英國高出9400萬美元或0.004%，成為世界第4大經濟體。不過排名仍然落後首3位嘅美國、日本及德國，即係只做到「超英」，未可以「趕美」。若以人均計，則更屬於落後地區。
所謂GNI，係將國內生產總值（GDP）加上從海外獲得的租金、利潤及勞動報酬等淨收入流入。世銀通常以過去3年嘅滙率平均值將各國貨幣換算為美元後再排名。世銀話，如果以去年全年平均滙率水平計算，將各國GDP換算為美元，中國嘅GDP去年已經超過英國。