講開啟德機場規劃藍圖，有人鬧點解要建立一個二十二公頃嘅「中央公園」，大到離晒譜。呢日碰到N教授，聽佢講解，先至明白，亦因此知多啲點解規劃處要如此規劃，因佢哋面臨嘅限制多多也。
第一、興建郵輪碼頭，碼頭要在水深、易泊船地方，故此一定要在機場跑道末段臨海地帶，冇得郁。
第二、啟德明渠唔准填平，因為呢度填海冇凌駕性需要，政府唔想為此打官司。唔填海，如何解決臭水問題？佢哋挖空心思，諗到挖空與明渠平行一段嘅跑道底，等海水可以流出流入明渠，沖淡晒啲臭味，死水變成活水，但挖空地底，唔打得樁，於是冇可能在上面起屋，只能在上面鋪蓋一個公園（此公園事實上等同一條巨型跨海天橋），故此搞到有二十二公頃咁大。
第三、定下一個郵輪碼頭，一個「中央公園」之後，其他地方如何裁剪？碼頭與公園中間，唔通起居屋公屋咩，「瑪莉皇后號」泊咗碼頭，大豪客邊度願意立即見到啲醜怪石屎群呀，見吓啲低密度靚住宅就無妨，於是咪就此成為低密度住宅區囉。
第四、冇地賣，點樣收回成本吖，高密度住宅最好與沙中線地鐵上蓋連接，住客行落地鐵站，唔使幾分鐘，賣樓賣地都可以賣貴啲。
第五、於是剩番一幅近海，容易畀遊客影到相嘅空地，起件靚靚、現代化嘅大型運動場館就最啱嘞，何況體育界、康文署有強烈要求㖭！
以上睇嚟，全部合邏輯，冇乜好拗。N教授歎息話：「全部規劃問題出於唔准填海。我好反對再填海，縮窄維港嘅。但啟德明渠實際上已多年與維港隔絕，唔算係維港一部份，填咗佢，對現有維港全無影響，唔影響維港生態環境。填平咗就唔需要挖空跑道底，多咗好多用地，而且規劃上少咗好多限制（constraints）啦，譬如立即可以將個中央公園向上移，更接近住宅區讓市民享用。𠵱家唔填得海（明渠），成本大好多，效益細好多，可惜也！」