世盃最近多咗好多互射12碼睇，龍門真係少啲反應都唔使旨意救得出幫球隊贏波，本身擅救開12碼嘅葡萄牙門將列卡度彭利拿就話捉對手眼神最緊要，但係德國門將列文一於話之你，一對雙眼夠「兇」已經殺晒！
睇開波嘅球迷都知列文性格火爆，不過近年佢又確實係成熟咗同收斂咗，好似8強12碼射贏阿根廷之後，全隊隊員瘋狂慶祝，惟獨列文一個好鬼冷靜，完全具備大將之風。列文話：「我哋嘅任務未完成，所以我覺得低調好啲，當攞到冠軍嗰陣我先會慶祝，我要揚名立萬。」
波歷克：列文眼神得人驚
列文上場救出阿根廷兩球12碼，絕對係晉級嘅最大功臣；對於列文救12碼嘅精采演出，連隊長波歷克都讚不絕口，話呢位隊友對眼「兇」到痹，令對手望而生畏。波歷克話：「淨係望到列文對眼，已經冇晒信心可以射入佢，我相信冇球員會願意喺12碼對住列文，包括我在內。」
列文又係嘅，人高手長眼「兇」樣樣齊，望到佢個樣都嚇親。不過話時話，下屆英超車路士對阿仙奴如果博到12碼，睇怕啱啱加盟車仔嘅波歷克都唔會係劊子手囉！
專家話：門將眼神可制敵
「其實列文是待對手施射12碼後才撲救，這是因為他的彈跳力及反應佳所致。當然，眼神也有影響，不然教練不會叮囑球員射12碼時，切忌與門將有眼神接觸。」
鍾皓賢（南華門將）
網民反應：列文救列基美12碼經典
外界覺得列文還是列卡度彭利拿才是「救12碼之王」呢？「12碼都係講運氣啫！」「列文勁啲！佢之前喺阿仙奴都救到列基美嗰球。」「都係列卡度彭利拿啦！」
世盃判官歡迎球迷來稿
世盃判官係1個在世界盃期間專為廣大球迷而設嘅欄目，球迷如對賽事有任何投訴、意見，想同我哋分享，就快啲投稿！來稿勿過300字。
世盃判官體育版電郵：[email protected]
體育版傳真熱線：23703534