鄭秀文（Sammi）拍完《長恨歌》之後，好耐都冇拍戲，最近都只係見佢拍吓廣告咁。馮仁昭聽聞寰亞原本想搵Sammi同黎明拍一部愛情片，仲會由葉錦鴻執導同埋陳慶嘉寫劇本，但部戲搞咗成年都係開唔成，好似話Sammi對個劇本唔係咁滿意，所以改完又改，到搞掂個劇本，寰亞又覺得文藝片危險，頂多畀六百萬製作成本，但係陳慶嘉同葉錦鴻就覺得呢個價冇可能拍到，結果擱置咗呢部戲。
扮演舞孃
其實近年嚟寰亞公司都畀咗唔少劇本Sammi睇，但好多戲都唔啱佢心水，所以搞極都開唔到戲。而陳慶嘉就轉而幫美亞公司開一部以tabledance做主題嘅新戲，聽聞同美亞仲有兩部片約嘅楊千嬅，有機會孭飛拍呢部戲，如果真係成事，都算幾大突破喎！
