衞生福利及食物局局長周一嶽近排忙於應付禽流感，又俾食物安全問題搞到一頭煙，八方聽聞，周局長嘅95歲爸爸周覺識，上星期六因病入咗伊利沙伯醫院，仲住喺頭等病房留醫。周覺識佢來頭唔小，除咗係局長父親之外，仲係退休高級公務員，曾任助理教育司。
每次周老先生入住伊利沙伯醫院，都會惹起有人使用特權嘅疑雲。八方噚日又再聽到有醫護人員投訴，佢哋話一般病人入急症室，首先要安排住喺普通病房，經申請先住得頭等病房。但今次周老先生一入急症室就即上頭等病房，情況有啲唔尋常。八方就呢件事問過局長嘅新聞秘書，佢話件事同公務冇關，冇乜回應。佢仲補充話周老先生係退休公務員，有權入住頭等病房。
醫管局就話，未得病人同意，唔講得個別情況。但係由7月至今，伊院頭等病房入住率只得7成。查實係人都知周局長曾經喺伊院做過一段長時間，04年都有人投訴過周老先生喺伊院頭等病房住咗好耐。八方希望周老先生早日康復，不過話時話，周局長身為高官，係咪都應該要緊記瓜田李下，小心俾人誤會？