谷德昭的緋聞女友林子萱（KiKi）日前穿上比堅尼嬉水兼滑水。沉寂了一段日子的她最近轉投新公司，形象亦來個180°轉變，原本帶點babyfat的她變得纖瘦，慶幸仍保得住35C的豐滿上圍，身形更見突出。
入行多年的林子萱星運平平，令人印象最深的大概是其谷德昭緋聞女友的身份，早前KiKi被前唱片公司安排到台灣發展，但最後首張唱片胎死腹中。這年來甚少曝光的她終於與前唱片公司了結關係，轉投新經理人及新唱片公司，並有新歌《過度活躍症》派台，有望年底推出首張唱片。
教舞賺生活費
回望過去一年，賦閒在家的KiKi表示根本沒有動力走上街，她說：「我好怕人哋問我幾時出碟，唔知點答好，閒時喺屋企幫人填吓詞，亦有教小朋友跳舞賺啲生活費。」
KiKi日前到大潭篤滑水，穿上比堅尼的她身材更勝從前，babyfat不見了，身形更顯瘦削，慶幸35C的豐滿上圍還保持住。她滑水時輕易起水，看來技術不錯。被問及再戰樂壇會否走性感路線？她說：「我唔介意着比堅尼，但唔係刻意性感，要睇場合，好似去沙灘游水着比堅尼，好正常啫，無端端喺街着比堅尼就梗係唔敢。」
提到早前出席緋聞男友谷德昭母親的喪禮，KiKi認為這是尊重朋友，故毋須避忌，她說：「五、六年前喺商台做暑期工識佢嘅，閒時都會約埋打羽毛球，我都食過谷伯母煮嘅嘢，覺得送佢最後一程係禮貌，唔會介意人點講。」
採訪：卓美娟
攝影：陳偉權
服裝：QUIKSILVER
化妝：PuiPui
髮型：Hair（Kit）@KenQi
