煲呔以特首身份喺回歸日宣布論功行賞，以示聲威，正如八方一早預料，因忽然腳痛而落台嘅董建華果然獲頒特區最高勳章──大紫荊。呢啲咁嘅荷蘭水蓋，正式係順水人情，錦上添花，本來都冇人有興趣，因為度嚟度去，老董除咗堪稱係香港民主之父，就真係乏善可陳。
點知深明親疏有別嘅煲呔搞個排名有先後嘅名單，咁老董如果有種，真係要再腳痛一次，10月千萬唔好去禮賓府接受煲呔頒獎，以免俾人睇死，影衰國家。
老董本來就有十萬個理由唔要呢個大獎，首先，頒獎畀你嗰位係你前下屬，本來你做得好哋哋，忽然中央屬意你個no.2取代你，你個副手不但冇拒絕，同你共同進退，仲喜從悲來，恨不得你即時走人，讓位畀佢，由咁嘅超級世界仔頒個獎畀你，你係咪應該唔要先。
第二，老董非自願地讓位之後，煲呔仲成日有意冇意重提八年浩劫，話港人度過咗八年惶恐日子，即係從來冇真心讚你，畀個獎你都係假意，要嚟棧自欺欺人。
只怪當年養權為患
第三，最離譜嘅係既然畀就畀得好好睇睇，點會將老董個大名放喺李業廣同李東海後面，個禮賓處處長阮文海話，佢係按特區政府排名表排先後，由於𠵱家冇「前特首」呢個排名（政協副主席唔計），所以老董就排最尾，即係連區議員都不如。咁就真係有心侮辱喇。喂，呢啲排名表點解唔可以即時update一吓，老董落台已經一年多，唔通成日高舉強政勵治嘅煲呔連叫禮賓處加番個「前特首」名都搞唔掂？咁點解佢個禮賓府又咁快裝修好？
呢啖氣阿董真係吞唔落，李東海個金紫荊星章都係老董畀，李業廣有幾大功勞，當年都係老董搵佢入行會，前特首點都威過好多人啦，煲呔唔敢畀個位老董企，唔知係咪怕映衰自己，不過，他朝煲呔退下特首位，都係同老董同一階級，今日冷待人，唔通唔怕將來俾人冷待。
老董千錯萬錯，當年打煲呔入冷宮做清潔大隊長之後，冇立即將佢降級，結果養權為患，今日煲呔貴為特首，竟然如斯無禮，所謂不食嗟來之食，此大紫荊萬萬不可取，否則堂堂政協副主席，地位不及李東海，你話呢個國家領導人顏面何存？