銀行公會噚日第二次搞午餐會，搵到煲呔大力推薦嘅中國銀監主席劉明康主講，佢原定上周一落嚟，臨時要延遲一個禮拜，喺佢到訪前幾日，QDII就有好消息出，真係夾都冇咁啱，睇怕劉主席上星期嘅公務，都係同呢件事有關！
噚日朝早到晏晝嘅幾粒鐘，撞正立法會財經事務委員會開會，公審銀行減分行，王冬勝同埋一眾賓卡要到場解畫，11點開完會，即轉場準備午餐會，渣打蘇利民、中銀香港林炎南、永隆伍步謙等，全部都要走兩場。
除上述賓卡，午餐會嘅賓客仲有金管局任總、港交所周文耀同埋證監韋奕禮等幾百個賓客，鬼咁熱鬧。一開波，王冬勝笑笑口話，睇怕都唔使點介紹劉明康，事關邊個唔識佢，就咪使旨意攞到QDII個牌。
咁難得見到劉明康，唔少在場嘅賓客都爭住問嘢，有人即場約劉明康搞小型座談會，又有科大生喺幾百官商面前大膽提問，劉明康聽完之後，即刻讚對方係「勇敢的大學生」。
李國寶未見影
到家吓為止，外資銀行得滙豐同東亞攞到牌，身兼公會主席嘅滙豐執董王冬勝，全程傍實劉明康，仲搵埋自己間行嘅公關同埋實Q護駕，會後又出動掛住「港粵」車牌嘅積架接送貴賓，樣樣做到足。
反而一早爆響口，話劉主席會到港演講嘅東亞主席李國寶，晨咁早去電盈開董事會（佢係獨立非執董），個會未完又急腳離場趕去立法會，但偏偏冇喺午餐會現身，淨係派咗彭玉榮到場，唔知係咪已經成功敲門，唔使怕煲呔鬧wherewereyou，所以索性唔到呢？
李華華
讀者如有任何意見或報料，歡迎發送電郵至[email protected]。