本港銀行上個禮拜唔跟美國加息，地產股即時反彈，樓市都應該有番啲起色，多番啲人問吓價同睇吓樓，有意買樓就更加想預先計吓自己嘅實力，唔係搞到撻定收場就無謂啦。講到計數呢家嘢就認真煩，所以美聯網頁搞咗個「財政預算一按通」，等啲有興趣買家早啲計定數。網址www.midland.com.hk/chi/oneclick.shtml。
呢個所謂「財政預算一按通」，聽落個名好官方同專業咁款，實情係新一代置業貸款計數機啫，蘭西有登入去睇過，覺得幾方便。
裏面分咗四類選擇，除傳統嘅計數機外，新增咗上車、換樓同租轉買幾類計算功能。以換樓做例子，揀咗區域同地區，輸入心目中屋苑同呎數，按「下一步」鍵後，輸入自己層樓𠵱家值幾錢、欠銀行嘅金額同手頭可動用資金，再按「下一步」鍵後，就可以查到喺唔同按揭成數情況下，買得起嘅物業價值。「上車一按通」嗰個仲方便，可以淨係推個「bar」，個表就即時顯示個結果出嚟。
當然，計完數之後，仲有一樣最重要嘅嘢，係有乜嘢啱要求嘅單位可以揀。美聯畀埋熱線電話你，咁公司做生意機會又大咗，仲唔使周圍去搵客㖭。
電郵地址：[email protected]