德國今屆喺決賽周嘅表現相當唔錯，上場對住實力強勁嘅阿根廷，苦戰120分鐘，最終互射12碼擊敗對手晉身4強。
三線實力平均
睇過德國喺決賽周嘅5場賽事，發覺佢哋愈踢愈好，而且防守一場比一場好，攻力就更加唔使懷疑，5場已經攻入咗11球。雖然意大利上場喺毫無壓力之下，以3:0淘汰烏克蘭，但略嫌佢哋喺決賽周贏嘅球隊唔夠說服力，最叻嗰隊都只係贏捷克。
不過意大利勝在前中後三路嘅實力都相當平均，至今5場賽事攻入9球只失1球，就算失嗰1球都只係後衞薩卡度嘅「烏龍球」。因此，今場我相信意大利喺90分鐘內可以守和到對手，一於揀個讓球「客勝」。
葡軍往績遜色
另一場葡萄牙對法國，葡萄牙上場喺人多打人少之下，仍然未能喺90分鐘內擊敗英格蘭，仲要去到互射12碼階段，先可以淘汰對手，得以晉級。
無可否認，葡萄牙嘅表現認真對辦，不過相比起法國，佢哋就略嫌遜色，話晒法國近兩場贏西班牙同巴西，都係以技術性擊倒對手。加上法國整體球員，都發揮到應有水準，老將施丹大踢爭氣波，狀態弗到甩晒轆。法國狀態咁好，今場一於捧佢哋場，揀讓球「客勝」。
陳樹鵬（阿鵬）
有線球彩台主持
電郵：[email protected]