7月份第1個交日，有好開始，恒指升59點。以全月計，今年1月升877點，2月升165點，3月跌113點，4月份升856點，5月跌804點，6月升411點。
7月底會係幾多？萬七點買上唔買下。
中石化C輪9227：中石化（386）大利市機顯示收4.45元（4.425元有2球買入，4.45元有5.5球沽出），電腦判收4.40元，跌5仙。中石化係重型基金股，跌得落去起得翻身。國企氣氛良好，中石化自動成為龍頭股之一。
買定中石化C輪，咪揀啲幾十倍槓桿率嗰批，事關溢價過高，呢啲輪隨時唔跟正股移動，除非正股跳動得好厲害。實實際際，買9227。隻輪9月中到期，輪價80仙，溢價2%，槓桿率5.5倍（有效4.5倍），引伸波幅48.5%。隻輪冇錯槓桿率唔多夠爆炸，但低溢價肯定代表會跟貼正股走，正股升佢升，正股跌佢跌。早排有讀者買咗3812，輸到頭耷耷，話輪價唔跟正股走，就係因為揀錯數據唔妥窩輪，結果睇中方向都要輸錢。
中銀C輪3641：中行（3988）A股明日喺國內掛牌，中行同中銀（2388）都睇好，中行未有C輪上市，買中銀C輪，對象係3641。隻輪11月初到期，輪價7.8仙，溢價3.5%，槓桿率19.6倍（有效10.6倍），引伸波幅21.4%。
章盛