我討厭二手煙，很多食肆有設立所謂的非吸煙區，但隔不夠兩張枱就是吸煙區，有等於無，我鍾情茶餐廳，茶餐廳要無煙？做夢好了。好彩凡事有例外，廟街就有兩個大男人，不吸煙還開了間無煙食肆，賣的不只是大路茶餐廳食品，還有別出心裁的刁鑽菜式，抵撐！
記者︰方綺君 攝影︰陳盛臣
老闆：我叫煩事通！
「為食坊」先吸引我的不是裝修、菜式，而是「煩事通」這名字，接過老闆煩先生的卡片，問了一個愚蠢的問題︰「你身份證都係呢個名？」哈哈，當然不是了，問都多餘！煩事通解釋：「我6年前改呢個名，6年前我仲做緊建造業判頭，生意有阻滯，得個做字，有汗出，無糧出，唔開心一排，後尾諗通晒所有煩嘢，咪改呢個名囉。」當年事業怎樣糟，他只輕輕帶過，直至談到拍檔勞文，他才滔滔不絕：「風光嗰陣我揸Benz跑，20年前因為一架Benz認識咗佢，佢覺得我架車靚吖嘛，咪大家開始吹水囉。」人生有高低，煩事通後來當的士司機，最後因為食學廚，至一個月前開了現在的「為食坊」，所謂五窮六絕七翻身，事業算是安定落來了。
大廚：我煮嘢好刁鑽！
煩事通與勞文並非煙民，最討厭人食煙，開食肆第一時間申請無煙食肆，要讓食客有百分百的無煙空間用膳：「夥計呢，盡量唔請煙民，喺舖頭就更加唔可以食煙。」店內菜式全由煩事通一手設計，有大路的茶餐廳快餐小食，亦有製法刁鑽的小菜。看看餐牌，地震豆腐、涼瓜炒苦瓜，菜名好有趣，與煩事通的名字不遑多讓，他說︰「我好為食，所以同大廚一齊諗好多新菜，希望再加埋個得意名，食客會食得開心。」大廚施先生外號「為食廚神」，這外號又是煩事通改的，「我有20幾年入廚經驗，做任何菜式都無難度，去過大陸、東南亞地區同澳門搵靈感做新菜，煮嘅嘢好刁鑽㗎。」
刁鑽在︰豆腐要切薄片，再層層叠高，好易散。
震一震都散的地震豆腐，好花工夫！豆腐搭銀魚仔肉碎層層叠，銀魚仔肉碎的醬汁集中日韓大成，是中式秘製汁、日式燒汁和韓式燒肉汁合成的「混醬」。入口冰涼，一口清新的豆腐夾一口惹味混醬，正！因工夫多又難做，所以每日限量發售15份。
刁鑽在︰蘸特製士多啤梨汁，有誠意。
脆炸而無油膩感，加拿大桶蠔配士多啤梨做的醬汁，酸酸的與蠔汁配合得天衣無縫。粉漿經特別調校，火候控制好不會吃到一口粉。
刁鑽在︰飯炒得乾身，火候控制得好。
這是個無肉類的健康素食，簡簡單單只用雜果仁粒、瑤柱、提子乾炒飯。為食廚神話︰「呢個菜補腦又少油，好健康㗎！」能否補腦，未知，香口，卻是肯定的。
刁鑽在︰選用肉眼筋，代替一般豬肉。
肉眼筋比一般豬肉嫩滑得多，味道呢？我試過，老實與一般咕嚕肉差不多，不過比較甜少了點酸，值得一讚的是肉質較嫩滑，外層脆漿入口的確卜卜脆。
刁鑽在︰話梅和酸梅的份量要合比例，否則會勁苦。
涼瓜連同話梅及酸梅浸兩日，令苦味十足的涼瓜變得甜甜酸酸，味道似在涼果店買到的浸芒果差不多，入口先嚐到酸味，再來是一陣甘甘的味道，從未吃過如此甘甜的涼瓜。
刁鑽在︰製法繁複，同一種食材兩種製法。
涼瓜炒苦瓜？聽菜名都覺得奇怪，原來碟內一半涼瓜先拖水後炒，另一半則直接生炒，前者會較淡，後者則較苦，所以能食出不同層次的苦味，簡單得來明顯看出師傅肯花心思。
食客有Say︰
想食煙？咪入嚟！
有調查顯示，香港超過8成市民偏愛光顧無煙食肆，令近年不少店舖都申請加入無煙行列，當中有137家是獨立食肆，集團式的連鎖餐廳則多達644家。人們常有錯覺，以為設「吸煙區」和「非吸煙區」的就是無煙食肆，其實只有店內全面禁煙的食肆如「為食坊」才算無煙食肆，衞生福利及食物局控煙辦公亦會發出一個「牌匾」以資確認，詳情參考網址：http://
www.tobaccocontrol.gov.hk/chi/index.html#
搵食攻略
為食坊（27361736）
地址︰佐敦廟街286-298號D、E舖
營業時間︰7:00am-12:00mn
座位︰約80個，對面童軍總會設停車場
交通︰佐敦地鐵站C2出口
最好賣︰蠔仔粥日賣過百碗，甜甜蜜蜜脆桶蠔都是另一熱門之選
