煲呔噚日點都唔肯再講7.1，話政府乜都當日回應咗，就係政府有決心基本法會達致最終全面普選目標云云，即係講咗等於冇講。
大家睇嚟都唔會問到啲乜嘢，惟有等下周一立法會特首答問大會時，班尊貴議員再問佢。
遊行唔講，但問佢點睇世盃巴西同英格蘭入唔到四強，佢就有嘢講噃，因為當初佢老哥講過希望巴西入到決賽，結果輸咗，佢當然有啲失望。原來煲呔都識得偷得浮生半日閒，7.1睇咗成日有線新聞直播遊行，夜晚佢就睇咗場英葡大戰。
煲呔一直唔肯講自己捧邊隊，但係當日去巡區，就買咗件法國球衣畀個仔，𠵱家件衫就真係大派用場，因為法國隊愈踢愈勇，連原來捧巴西嘅行會成員范鴻齡都轉投法國懷抱，話法國隊有隊形。