息口走勢比較明朗，市場氣氛稍為好轉，即刻見到有公司搶住出嚟批股，繼上周利信達（738）集資、蒙牛（2319）大股東配售舊股後，昨日又輪到中國香精香料（3318）批股，以每股3.10元至3.30元，配售7312.6萬股。
據講大股東套現部份，同新股配售數額一樣，各佔一半，計落公司都集資到億幾銀，據講配股全部去晒貨。雖然接連多間公司批股，但投資者全部都食得晒，似乎班芬佬水頭相當充裕。
另外，自從內地話批准加電費後，電力股生猛番晒，中國電力（2380）係首批准獲加費的電力股，個別大行亦即時調高佢嘅盈利預測。但經紀黃話，最近有證券行推介中國電力，唔係因為電費問題，而係預計即將有一輪注資行動。
中國電力自上市以來，雖然挾住李鵬位千金之名，但除咗上市初段威過後，一直都乏善足陳，主要由於電力股受到煤價及油價上升增加成本，但又唔可以大幅加電費轉嫁成本畀用戶，實在唔怪得間公司管理層。
中國電力昨日走勢先高後低，最後跌1.75％，收2.80元。
慕容小初