今年7.1有成5.8萬人上街，陳太效應同佢嘅去向自然成為大家嘅熱門話題。法律援助服務局噚日舉行成立十周年酒會，大家話題都離唔開7.1同陳太。
出席酒會嘅政務司司長肥龍好鬼識走位，見老細煲呔成日都唔肯親自公開回應，佢就面對記者追問都當睇唔到，聽唔到。反而行政會議成員范鴻齡夠膽識，佢話7.1遊行係好平常同好健康，證明香港環境好，港人有意見都可以表達出嚟，至於人數多少唔係問題。而陳太都係普通市民一個，佢都可以遊行，唔應該當佢係前高官而「另眼相看」。
問佢陳太出嚟選同煲呔爭好唔好？范生話，佢都好希望見到多一個人參選特首，因為有競爭好過冇競爭，係陳太或者李太都好。
出席同一場合嘅民主黨馬丁就話，希望陳太可以攞足100票選委嘅提名，佢同陳太咁老友，都唔知陳太喺未來幾日，會有乜重要講話發表。公民黨主席關信基就話今年7.1有咁多人行出嚟，真係難能可貴。至於公民黨會唔會支持陳太，佢就話要等陳太有決定先算。
講番個酒會主題，今年係法援局成立十周年，主席李澤培話每年發現濫用法援個案唔多，未來會計劃幫多啲業主立案法團，希望令法律援助有進一步發展。
噚日出席酒會仲有好多法律界人士，包括終審法院首席法官李國能同律政司司長黃仁龍，黃司長話，已經習慣份工作，由於應酬多，已學識每餐食一半，否則會變肥龍。
