每場球賽完上半場之後，都會有15分鐘break，畀班球員入去更衣室休息，兼且教練可以同埋班球員研究下半場戰術。趁呢段時間，現場球迷可以排隊去廁所，家庭觀眾亦把握時間，走入廚房泡番個杯麵醫肚。呢15分鐘就成為大家所謂「去廁所位」。
啦啦隊助興派用場
不過唔係人人都會離開座位買嘢食或者去廁所，所以大會都好應該照顧呢班球迷。我認為佢哋可以仿效美國NBA咁，趁半場休息嗰陣，請番幾隊青春活潑嘅啦啦隊助興，喺球場上面跳跳舞擘吓大腿；咁樣可以為班男球迷帶來視覺上享受，相信佢哋一定會舉腳贊成，而且亦可以將現場熱鬧沸騰氣氛延續到下半場。
不過我驚班球員見到呢班青春少艾出場，個個都唔肯返入更衣室，要同班觀眾一齊欣賞佢哋表演咋。
彭浩翔
電影導演