採訪隊推介
聰仔心水：意大利下盤、意大利W
華度心水：葡萄牙下盤
最近德國人唔單止為自己國家隊打氣，仲幫埋葡萄牙呢支南歐球隊打氣，每有葡萄牙嘅比賽，都聽到好多德國人嗌死佢哋對家，點解？葡萄牙16強對手荷蘭，以及8強對手英格蘭，都係德國球迷眼中釘，恨不得早啲送佢哋返屋企；所以呢兩場波，有大量德國球迷喺賽前賽後都向荷蘭躉及英格蘭躉揶揄一番。
德國球迷為葡軍打氣
其實葡萄牙4強對手法國，亦唔多受德國人喜歡，兼且睇牌面實力，法國似乎高過葡萄牙少少，德國人如果過到意大利呢關，梗係想喺柏林對住隊實力比較弱嘅球隊啦。華度相信呢場大戰，葡萄牙擁躉絕對唔會少，即使德國隊早1日被意大利搶走個決賽權，佢哋都唔會想畀法國佬入到決賽。
法國隊教頭杜明尼治，擺到明唔算係1個好教練，幾次入到球場睇波，見到杜明尼治同佢班球員都冇乜溝通，將帥不和傳言似乎唔係吹水料。葡萄牙教練「大菲」就話晒係上屆帶領巴西贏波嘅教頭，比賽中每見呢位巴西人喺場邊指手劃腳，肉緊非常；華度始終都係相信「大菲」多過杜帥。
仲有就係，法國隊始終都好似要靠施丹嚟料至有啲嘢睇，弊在施丹家陣已經唔似得幾年前咁場場有料到。今仗法國要讓波，點計都無理由唔要下盤。
文：華度