華華之前講過，金銀業貿易場上任理事長程文傑坐定粒六等連任，點知中途殺出個李德麟，既有伯爺李和聲撐，又有叔父輩金勞詹支持，結果成功坐正，搞到有人好夢成空。噚日金場有新搞作，造就新舊兩任理事長李德麟及程文傑，喺選舉後第一次同場見傳媒。
程文傑一開聲，就話李德麟係「眾望所歸」，不過講唔夠兩句，又叫錯人哋做副理事長，坐正嘅李德麟就笑笑口，多謝上屆理事長嘅努力，大家都交足戲，影埋張大合照之後，程文傑話都冇咁快就閃離場，華華想同佢傾多句都冇機會。
咁金銀業貿易場嘅新作係乜？就係實行新嘅金條驗印制度。李德麟話，以前用驗金石同金板測成色，師傅憑經驗判斷；家吓就改用電子測量儀，準繩度高好多，但係技術暫時只係用於九九金。除咗新技術，呢兩日，又傾緊跟隨銀行五日結算，一旦成事，可能會取消星期六半日金市買賣㖭。