世界盃四強大戰明日凌晨一觸即發！首場戲碼由東道主德國對意大利，而後日凌晨則由第二度打入四強的葡萄牙對戰98年冠軍法國，龍爭虎鬥必定精采。沒有巴西及英格蘭的四強之戰，亦造就了一班娛圈的變節球迷，周潤發棄巴西轉投德國，張文慈就改撐法國，而鍾嘉欣及吳雨霏就轉而愛上葡萄牙，只有本身有意大利血統的Soler最長情，堅持支持祖國。 採訪：比華利、陳月媚
支持德國--冠軍賠率2.65
周潤發 天時地利
其實巴西輸咗，我已經冇乜心機睇，如果要我喺四強入面揀冠軍，我會較睇好德國，因為成個球場都幾乎係德國球迷，有成六、七萬球迷喺現場同佢哋打氣，嗰種精神念力好緊要，再加上隊波又打得有板有眼，天時地利有齊，好難唔贏。
楊愛瑾 留鬚添運
我由第一場開始都支持德國㗎啦，佢哋狀態愈嚟愈好，我身為佢哋嘅fans都飲得杯落。今屆德國係主場，佢哋喺番自己地頭踢波，場場都好弗。我仲聽聞德國球員話要留鬚，直至決賽完畢，佢哋話留鬚有助增運勢，其實男人留鬚都好man吓。
古天樂 穩定取勝
德國愈打愈似樣，加上又有主場之利，我覺得隊波勝出機會係好高，佢哋唯一對手係法國，施丹同亨利加埋一齊，威力無比，佢哋連巴西都打低，所以呢隊波係愈踢愈有水準，德國始終比較穩定。
支持葡萄牙--冠軍賠率6
梁靖琪 潛力無限
睇完葡萄牙對英格蘭呢場關乎決勝負嘅賽事，最終以加時同互射十二碼3:1勝出，我睇好佢哋嘅潛力，相信好大機會可以晉身決賽。葡萄牙隊長費高，佢落場時毫不錫身，有佢帶領住隊波，士氣十足，只要球員之間再加多幾錢肉緊，勝算在望。
鍾嘉欣 調兵得宜
我雖然唔係好識睇波，但世界盃四強賽事，點都要湊吓熱鬧。今屆世界盃嘅賽果好令人意外，所以我會貼葡萄牙會爆冷贏。我聽講佢哋個教練史高拉利話要睇《孫子兵法》先贏波，好有新意。不過我都好欣賞佢哋嘅中場基斯坦奴朗拿度，佢活力充沛，球場上好有魅力，龍門列卡度就好穩陣。
吳雨霏 棄英投葡
我本來捧開英格蘭，但當佢哋輸咗俾葡萄牙之後，我就轉投葡萄牙。我好鍾意基斯坦奴朗拿度，佢除咗好腳法，又靚仔。其實我覺得睇球賽，如果會有爆冷賽果，比較預期嘅結果，會增加一定刺激，緊張好多。
支持意大利--冠軍賠率4.4
Soler 攻守兼備
我哋兩兄弟有意大利血統，當然捧意大利。意大利隊嘅後防一向好強，佢哋嘅前鋒又打出水準，簡直無敵。我對意大利隊打低德國嘅信心好強，意大利對葡萄牙係我嘅理想決賽組合。到時我會講意大利文「科沙呀珠利」（意譯：藍隊，勝利）打氣。
陳慧琳 愈打愈順
我會支持意大利，佢哋隊波除咗多靚仔球星，加上又好技巧，我鍾意前鋒東尼同中場托迪。我覺得睇近幾場賽事，發覺意大利除咗愈打愈順之外，佢哋都好有運，佢哋繼82年攞過世界盃後，都好耐冇攞啦，我好有信心今屆輪到佢哋。
莫文蔚 留學情結
由始至終，我都係意大利球迷，因為意大利靚仔球星多，女球迷當然係睇得賞心悅目，加上我喺意大利留過學，對呢個國家有一份很特別嘅感情，所以無論呢隊波踢成點，我都係支持者，而事實上意大利可以入到四強，證明隊波有一定水準啦！
支持法國--冠軍賠率2.9
張文慈 臨陣倒戈
我原本係巴西嘅擁躉，不過巴西大熱倒灶之後。𠵱家四強嘅陣勢嚟睇，我已經倒戈轉投法國隊，佢哋真係愈打愈順，加上真係有運行，愈近尾聲，就愈覺得法國隊好有冠軍相，大有機會挫敗擁主場之利嘅德國。
羅家英 施丹撐起
我不嬲都好支持法國，佢嘅中場施丹今屆踢最後一屆世界盃，表現仲係好勁，果然寶刀未老。由施丹帶領嘅幾場賽事，先後擊敗西班牙同巴西，我覺得佢可以成功超越強國巴西，由施丹斬波交畀亨利配合，可謂天衣無縫，我希望佢哋繼續加油，繼98年後再度捧走個世界盃。
張家輝 漂亮足球
初時我對法國冇乜期望，但睇完巴西同法國呢場波，對呢隊波完全改觀，施丹忽然生猛番晒後，成隊波好似脫胎換骨咁，直情係技術性擊倒巴西，贏得相當漂亮，唔似葡萄牙有咁多蠱惑嘢，所以𠵱家睇落去，法國好大機會捧盃。
冠軍賠率由香港賽馬會提供
