侍仔：尋晚陪女友睇錄影咗嘅意大利對烏克蘭嗰場8強，點知佢睇睇吓喊……
招積域：做咩事喊呢？莫非佢重注烏克蘭單W，所以輸到喊？但我都未喊喎！佢搞咩呀侍仔？
菠蘿文：侍仔快啲講啦，唔好喺度賣關子！
侍仔：佢睇到意大利班球員贏波後拎住張「比索圖，我們與你同在」嘅橫額囉！話見到佢哋咁齊心，個場面好感人，所以忍唔住即刻喊咗。
感動場面屆屆有
菠蘿文：嗰晚我都有睇，個情況好似03年洲際國家盃決賽。成班喀麥隆球員着晒13號波衫悼念去世嘅隊友科爾，大家都為佢爭勝，亨利入波後仲指向天，將入球獻畀科爾。
招積域：今屆又有幾多感人場面發生，記得千里達踢完對巴拉圭分組賽，約基除剩條底褲喊住同班球迷道別；而碧咸前晚被換出場喊，令我諗起90年嘅加斯居尼。大家都係喊，但感受就唔同啦！約基係開心，碧咸係遺憾再加無助。
菠蘿文：有咩嘢勁得過簡尼同列文呢對仇人可以攬埋一嚿呢？互射12碼嘅時候，簡尼係最後一個入草地為列文打氣，仲伸出「友誼之手」，列文之後個樣當堂輕鬆咗好多。
招積域：射之前就係囉，射完之後你無見到列文個樣好自信咩？好似同簡尼講：「我都掂㗎！你隻大猩猩見唔見到呀？」列文對眼嗰刻真係生咗喺額頭度！
侍仔：除咗喊，都有開心嘢㗎，法國贏咗巴西之後，成班球員仲高興過捧盃咁！
菠蘿文：梗係啦！贏咗場牙骱戰之餘，仲有機會拎埋世界盃冠軍㗎！杜明尼治今次真係執到！
高洛文