陳太一石激起千層浪，激到班左派跳跳紮，又忍住唔出得聲，真係幾好笑。於是乎好多人就將矛頭指向港台，話港台唔應該一連四日畀陳太開咪；話咁等於鼓勵人上街遊行，有違政府政策。
乜政府唔係話「理解遊行市民對普選的熱誠及期望」咩？乜香港特區唔係賦予市民有表達意見嘅自由咩？除非佢哋口是心非啫，否則支持遊行有乜問題？陳太上電台表達意見又有乜問題？
朱處長官場冇運行
不過咁，當權嘅人講一套做一套唔係未見過。都話到明親疏有別，爭在未講有仇必報啫。所以表面話理解，實則陳太睇怕以後都唔使去馬交食法國大餐，朱培慶處長在官場亦唔會再有運行。
嗱，好似個升旗禮，以往咁多年港台都有幫手，朱處長同佢嘅副手，年年都在現場打點，之後再過去開酒會。不過，前日朝早，八方就見唔到朱處長，亦唔見張文新，咁可能有人費事大家唔高興啦。
記協噚日發表年報，話港台應該獨立於政府，仲話港台前途極為重要，係香港新聞自由嘅象徵。唉，呢個記者嘅工會都真係太異想天開，唔怪得啲領導人話香港記者天真。畀港台獨立？發夢都冇咁早啦，閹咗佢就會。大家唔見啲識時務嘅俊傑已經跳出嚟話香港唔需要公營廣播，公然搖尾獻媚咩？
陪乖仔慶祝好過
講番升旗禮，八方想問清楚港台高層點解一反常態冇出席，不過一直冇人肯答。朱處長搵唔到，可能佢近日太高興，同個仔去咗食大餐以肥番幾磅，電話都冇聽。港台其他人亦話唔知乜嘢事，佢哋只係話八方早幾日寫負責陳太開咪個節目嘅張笑容區麗雅要搵定工一事，言過其實；仲話一定唔會咁話；但願如此啦。
講起朱處長好高興，要補充吓。佢唔係因為請到陳太做節目而高興咁「大逆不道」，只係佢位小公子今年考A-Level，攞咗兩個A兩個B，相信入港大同阿爸做校友都冇乜問題。八方都見過小朱，佢係DBS學生，平日好文靜，原來讀書咁醒。睇到張咁靚嘅成績單，朱處長應該老懷大慰，將一切頂住條氣嘅嘢拋諸腦後。有個叻仔，冇咗份衰工又點話。