政府啱啱先落實5天工作，但美資行美國運通（AE）嘅員工，一早就已經有呢種待遇，咁都唔止，每年7月至9月頭，佢哋仲有個「SummerFlexiHour」嘅計劃，所有全職員工，一個禮拜其中4日都返多一粒鐘，咁就可以額外有半日假，最多可以喺兩個星期內，儲埋一日放，真係羨慕死好多打工仔。
AE話，個計劃舊年第一次推出，主要係等啲員工喺暑假期間有多啲時間陪屋企人，特別係啲小朋友。咁着數嘅福利，反應梗係好好啦，所以今年咪再接再厲，繼續搞囉！
據華華所知，AE嘅員工唔止有暑假放，佢哋內部仲有非正式嘅指引，叫大家盡量唔好安排周五下晝開會，以免阻住同事收工歡度周末咁話。阿煲呔成日都呼籲大家生三個，之不過又冇乜實際鼓勵，真係搵鬼睬你咩；倒不如試吓向美國運通取經，迫班商界老闆善待員工實際啲。