巴西同英格蘭先後出局，搞到好多球迷冇晒心機，當正世界盃已經提早結束。巴西贏過五次，今屆雖然意外輸波，話晒巴西球星咁多，四年後又可以捲土重來；但英格蘭已經等咗40年，今年嘅人腳已經係近年最好，四年後碧咸都已經退咗休啦！
張文光話，英格蘭同巴西一樣，都係得球星、冇整體，成隊波一盤散沙咁，英格蘭次次射12碼都輸，唔知係咪俾人落咗咒，佢話睇怕有生之年睇到普選嘅機會，應該大過英格蘭贏世界盃，話晒爭取普選係靠人民力量，人民仲有機會改變現實，但球迷就算點樣打氣支持，都唔可以影響球賽結果。
長毛就好悲觀，話英格蘭贏世界盃同爭取普選一樣咁困難，香港嘅阻力喺共產黨度，英格蘭嘅阻力就係英超要改革，啲球會唔好再打高空波，一定要打多啲地波，咁先至可以適應列強嘅打法。
好彩有啲參加7.1遊行嘅市民，仲對英格蘭有期望。有市民同八方講，希臘都贏到歐洲國家盃，冇理由英格蘭乜都贏唔到！20年後未必有普選，但20年內都有五屆世界盃，冇可能屆屆都射失12碼出局啩？