被視為最有機會打入世界盃四強的英格蘭和巴西，在昨日凌晨舉行的八強賽事中，齊齊被對手葡萄牙和法國淘汰出局，數以萬計英格蘭和巴西球迷同聲一哭！一個結局兩種心情，身為英格蘭忠實擁躉的李克勤和劉德華，均認為英格蘭已經盡了全力，不應再加以怪責，其中華仔更指英格蘭輸了波，但贏得了尊重。相反，同是英格蘭死硬派fans的吳國敬，以及巴西擁躉葉璇則因為支持的球隊輸波而表現激動，其中吳國敬力斥朗尼連累英格蘭輸波，激動到想打朗尼一餐，而葉璇則要大細哨齊齊面壁思過始肯罷休。 採訪：比華利、藍文浩
冷靜派
劉德華 雖敗猶榮
見到碧咸受傷出唔到場喊，我都好心噏，不過，英格蘭雖然輸波，但贏咗尊重，冇咗碧咸，又打少個人，佢哋依然打得好好，完全冇鬆懈，雖敗猶榮。有人覺得英格蘭輸波係朗尼嘅責任，但我唔相信佢刻意傷人，佢係犯錯，但未嚴重到畀紅牌。
李克勤 下屆再來
英格蘭輸波我已經好失落，跟住一心諗住轉捧巴西，點知連巴西都輸埋，一日之內受到兩個打擊。我一心去睇朗尼，點知佢咁快就俾人紅牌趕咗出場。其實我認為朗尼真係唔識控制自己情緒，佢太過火爆啦，希望佢吸取教訓，下一屆踢世界盃時成熟啲啦。
林尚義 優勝劣敗
英格蘭同巴西都打唔出水準，大細哨又不在狀態，抵輸啦！朗尼嗰個係危險動作，一定係畀紅牌㗎啦。
激動派
葉璇 唔夠投入
巴西入唔到四強，太令球迷失望。我邊睇場波邊覺得唔對路，大哨朗拿度同細哨朗拿甸奴今屆嘅表現不濟，最初以為佢哋為咗留力打決賽，點知結果係佢哋未盡全力。巴西唔可以第六度衞冕，同球員之間冇協調，打得唔夠投入有好大關係，大哨同細哨都要返去面壁思過。
吳國敬 想打朗尼
我好嬲英格蘭嘅前鋒朗尼，因為佢嘅鹵莽行為，令成隊波失去入四強嘅機會，我𠵱家好憎佢，真係想親手打佢一餐，我要發起用佢個樣去打小人，希望可以打到佢跌落做後備，佢份人又冇波品，又連累我賭波輸咗成千蚊，認真激氣。
梁漢文 踢波發洩
英格蘭輸咗，係有少少失望，仲有朋友流眼淚。後來我叫班朋友落街踢波發洩，將列卡度（葡萄牙門將）當小人踢，不過冇人理我。最衰朗尼忍唔到，點會咁踢人哋個何B仔㗎？今次對佢成長係一個教訓，佢應該會好似碧咸上一屆咁，慢慢成為一個偉大嘅足球員。
張堅庭 抱子同哭
我同個細仔都係英格蘭同巴西嘅fans，睇見佢哋輸波，我個細仔即刻喊咗出嚟。英格蘭輸咗波，跟住巴西又輸埋，真係好傷心，巴西嘅大哨朗拿度細哨朗拿甸奴都表現失準，未盡全力，我好失望。
