連續兩晚，街上截不到的士，球迷趕着去睇波，的士司機大佬也是球迷，也趕着去睇波，結果是有乘客，冇的士，大家在街上行嚟行去望着手錶乾着急。
八強賽爆出三個冷門，阿根廷、英格蘭與巴西全部被淘汰出局，深夜散波時，街上繼續找不到的士，失望的球迷們一臉茫茫然。
德國隊踢法乾淨有紀律，踢逆境波亦不慌不忙，最後以最高心理狀態射十二碼擊敗對手，阿根廷球迷同聲一哭，其中不少更口中唸唸有詞咒罵領隊敗家文的戇居調配，非常火滾。
成也朗尼，敗也朗尼，全球聚焦所在，朗尼卻重蹈碧咸覆轍，侵犯對手被罰紅牌離場。英格蘭一條中場線其實高手如雲，但可惜眾高手們個個咁高咁大，反而唔知邊個先係重心，太多重心即係冇重心。領隊艾歷臣亦浪費了前鋒名額，結果係永遠爭臨門一腳。英格蘭出局，碧咸在場邊落淚，女球迷們看得心也酸了。
向施丹鞠躬，施丹為國家隊重拾球靴效力，一路走來飽受批評，但球王施丹低調踏實，默默耕耘，大量出汗，終於在八強賽回復神勇，以智慧踢球，瀟灑俐落，跟老戰友及新隊友踢出感情來，八強賽中的法國隊踢得令人喝采。我是巴西、英格蘭及阿根廷的球迷，但兩晚之間三隊先後出局，然而足球場上優勝劣敗有目共睹，勝者晉級，敗者返酒店執行李，冇得留低，喊都喊唔返。
世界盃真係好好睇。