巴西足球受全球球迷歡迎，每逢有森巴隊比賽，成個城巿就會俾黃衫兵團進佔。有線直擊隊噚日喺法蘭克福羅馬廣場進行直播，就遇到個另類森巴球迷。
直播當日大約喺當地時間下午4點，室外溫度高達30度。不過，羅馬廣場就有一位仁兄打扮成朗拿甸奴咁樣嘅毛毛公仔，呢位仁兄件「細哨戰衣」好似皮草咁厚，大熱天時笠住佢，咁熱又散唔到汗，隨時中暑都似。
每次合照盛惠1歐元
原本諗住訪問一下呢位熱情嘅森巴擁躉，點知一問就知道佢喺來自波蘭，打扮成咁都係為咗搵兩餐。聽呢個「毛毛公仔假細哨」講，如果球迷想同佢影相，就要放低1歐元。不過佢聽到有電視台訪問，就義務唔收錢喇。
「毛毛公仔假細哨」突出嘅打扮，當然成為球迷嘅合照對象；雖然有球迷嫌貴放棄影相，但大多數球迷都願意畀錢嘅；畢竟遠道而來，開心係最重要嘅。扮假細哨雖然辛苦，全身毛毛套裝焗到死，但係每次合照不過10秒就收1歐元；短短幾個鐘有幾百人幫襯，咁就搵到幾百歐元，好過唔少打工仔。咁有生意頭腦，香港人唔知會唔會有樣學樣呢。
巴西球迷迫爆晒成個羅馬廣場，點計都多過法國球迷。巴西同法國球迷嘅比例，大約係7:3。可能文化有別，法國球迷始終唔係太熱情，最多都係唱歌同叫口號，與巴西球迷瘋狂扭腰相比，真係大為遜色。
有線06世界盃嘉年華，將於7月4日晚11:30pm-午夜1:30am，播出世盃外景隊採訪滙報
