人稱褲王嘅旭日企業主席楊釗，生意多公職多係人都知，但實際有幾忙？從賣潮流服飾I.T嘅年報可略知一二。
由於旭日同I.T合作攻打內地市場，所以楊釗順理成章出任I.T非執行董事，但I.T總共5次嘅董事會議，佢嘅出席率居然係零！冇錯，即係一次都冇現身。
I.T年報白紙黑字寫明，7個人組成嘅董事會，由「經驗豐富的優秀人才組成，加上成員主要為非執行董事，故足以確保有關權力及權能充份平衡」。7個人當中兩個係兄弟，連埋啱啱升做副主席嘅盧永仁有兩個受薪，楊生又一次都冇出席過，到底又有幾「平衡」呢？
講開又講，I.T今年本年報嘅顏色主調係白色，舊年嘅主調係黑色，果然係搞fashion出身，連顏色都好講究。華華雖然唔知佢出年本年報會用乜嘢色，但斷估唔會係啲股民唔想見到嘅紅色啩？