一年一度嘅七．一遊行又結束，正如好多人嘅估計，算出埋陳四萬做號召，人數都係得嗰4、5萬貨仔！咁嘅「聲勢」，想中央感受到壓力真係妄想。講真，今年既冇大是大非、又唔係選舉年，又冇咗一個好似董建華咁嘅commontarget、仲要加埋之前一晚係世界盃八強戰嘅德國對阿根廷，人數已經算係唔失禮！
進士除咗89年參加過六四遊行之外（係！我唔似得煲呔唔敢認）其實未參加過任何遊行，因為好似七．一遊行呢類活動嘅發起組織引唔起我嘅興趣！舉個例子，民陣就係堅持雙普選、泛民就仲有參加功能組別嘅立法會議員、唔同意小圈子選舉但又積極參加選委嘅選舉爭取提名一個泛民嘅候選人參加特首選舉，同外國嘅政黨或政治團體相比，完全冇原則可言！佢哋走埋一齊搞遊行，進士覺得好搵笨，做埋啲「姿勢」嘢，又唔見佢哋合作阻政府嘅總部計劃，叫我出嚟上街，我感覺唔到incentive囉！仲有咁多市民「落叠」，算係咁啦！
應搞「高山會議」傾路向
進士覺得泛民真係要好好檢討，唔好沉迷喺反23條立法嘅50萬人大遊行情意結，腳踏實地諗吓作為立法會議員嘅一班成員可以聯手喺立法會做啲乜，唔好一盤散沙俾政府逐個擊破。進士仲覺得泛民亦係時候搞番個類似「高山會議」嘅路向會議，諗吓爭取民主路何去何從，要爭取民主可以用乜嘢策略！
另一方面，民主黨高達成日話要喺黨內「捉鬼」、公民黨又話怕滲透！嘥氣啦！你哋攬住當寶嗰個民陣召集人李偉儀，又係一個恨出位恨到發燒、不擇路徑嘅小人物！當年03區議會選舉何秀蘭帶佢落灣仔區參選，佢負責落跑馬地搞局，對付港進聯嘅吳錦津，為咗想贏就同民建聯大送秋波，說人哋跨區合作，呢件事喺親中陣營仲係一件笑話。李小姐仲喺度扮民主鬥士？
成日都話要捉鬼，進士就幫你哋捉咗隻，要點處理就留番畀泛民自己諗嘞！