又介紹生果宴？咪柴台住，甚麼菠蘿咕嚕肉、士多啤梨骨呢亭老土菜，你食唔厭我都唔好意思推介。今日介紹創意中菜，玩海鮮×生果，用士多啤梨、奇異果、石榴、啤梨、木瓜、荔枝等時令水果搭龍蝦魚翅，水果五顏六色賣相一定靚，酸酸甜甜味道一定好，當中原來以啤梨味最易食得出……
記者：李潔盈
攝影：林栢鈞
模特兒：Cannis（Salvador）
士多啤梨上湯焗龍蝦
南非龍蝦肉質白淨結實，配紅彤彤士多啤梨，齋睇賣相已經靚絕。酸甜士多啤梨帶出龍蝦鮮味，食落加倍嫩滑新鮮，加埋吸收晒兩者精華嘅墊底伊麵，唔食對唔住自己個胃。
仲夏、鮮果、龍蝦魚翅星斑全包宴（12位用$1,498）
奇異果法式煙鴨胸
法國鴨胸色澤分明肉質鮮嫩，建議一片奇異果夾住一件鴨胸嚟食，口感會特別清爽。墊底嘅鮮果沙律都無揸流攤，用嘅係凱撒沙律醬，絕非一般超市買嘅沙律醬可比。
石榴沙律海鮮卷
影相當日，師傅仲煩緊用石榴定哈密瓜做海鮮卷，經幾輪試食，最後裁定石榴勝出，因為石榴可以中和炸卷油膩感，兼有果肉渣，配帶子、蝦粒等同樣爽口嘅海鮮，食落更有咬口。
老干媽啤梨炒龍牙蚌日月貝
非洲龍牙蚌，因貌似龍嘅牙齒而得名；日月貝，因外殼鴛鴦色而得名。師傅用兩種彈牙海鮮配啤梨，加貴州著名老干媽辣醬落鑊炒，啤梨不但保持爽口，清甜味道亦無被辣醬蓋過。
萬壽果花膠魚翅羹
萬壽果即係木瓜，係坊間流傳嘅豐胸食材，花膠有養顏功效，加埋矜貴魚翅煮成羹，入口清甜啖啖滑翅，食完豐胸又護膚，一碗滿足女生兩大要求，唔使食豐胸丸做Facial咁煩啦。
荔枝蜜豆炒斑球
原粒荔枝起核，晶瑩通透有咬口，翠綠蜜豆色水靚兼爽口有營養。用蜜豆荔枝炒斑球，即刻為鑊氣十足嘅菜式加添清新滋味，一啖星斑肉一啖荔枝肉，名副其實啖啖肉。
食客有Say
係人都識讚：「好味！」但唔係個個食客都估到啲菜式用乜生果入饌。今次搞搞新意思，唔係求其試啖畀意見就算，我哋出動試食大使Cannis幫食客蒙眼試食，迫佢哋用味蕾估吓食緊乜嘢菜，結果……
試食菜式：萬壽果花膠魚翅羹
估計使用生果：荔枝（錯！）
Sally：「我仲以為係荔枝，原來係木瓜，不過啖啖翅好清甜，真係要食多兩碗。」
試食菜式：石榴沙律海鮮卷
估計使用生果：哈密瓜（都錯！）
Joe：「脆卜卜好香口，春卷皮炸得好乾身唔會成擔油，食炸嘢都可以健康啲！」
試食菜式：士多啤梨上湯焗龍蝦
估計使用生果：估唔到（諗極都諗唔到，唔好意思迫佢！）
蘭子：「食得出酸甜味，原來龍蝦可以加士多啤梨一齊煮，龍蝦好嫩滑呀。」
試食菜式：石榴沙律海鮮卷
估計使用生果：生果（同無答一樣！）
華叔：「食得出有生果渣，估唔到係石榴。個卷香脆，海鮮有口感。」
試食菜式：老干媽啤梨炒龍牙蚌日月貝
估計使用生果：啤梨（Bingo！）
劉小姐：「啤梨炒過但仲好爽，蚌同日月貝好有口感，辣醬好香一聞就想食。」
生果菜賣相靚爆
同「寶湖」行政總廚照叔食飯，見佢稍為肥膩啲嘅嘢都唔放入口，相信唔單止佢，好多香港人尤其視減肥為終身事業嘅女生都要求食得少油。一般傳統中菜比較油膩，所以照叔不斷改良：「我希望做到少油又好味，咁先會留住𠵱家啲食客。今次用生果革新中菜，一來因為生果當造又甜又多汁，二來因為生果營養豐富，加入中式菜餚，唔單止令賣相更吸引，仲可以改變一般人對中菜油多肥膩嘅睇法。」講完生果，講海鮮，照叔喫片奇異果繼續話：「海鮮呢，我都特別挑選最新鮮嘅時令品種，就好似龍蝦咁，我揀南非同澳洲品種，因為喺七八月，呢兩種龍蝦嘅肉質最嫩滑，唔鮮唔食，咁至好食，我話嘅！」生果宴有個水蛇春咁長嘅名，叫「仲夏、鮮果、龍蝦魚翅星斑全包宴」，12位用盛惠$1,498，均除每人$130有找，計落都抵撐。
老干媽川辣醬 啱炒海鮮
響晒朵嘅老干媽辣椒醬，由貴州一位經營食店嘅女士陶華碧創製。事緣佢發現自己嘅麻辣醬受歡迎過舖頭嘅食物，於是索性開公司改賣辣醬，仲用自己個花名「老干媽」命名，結果深受全國歡迎。老干媽醬同一般辣醬唔同之處，係加入有骨雞肉，食落除辣椒味外仲充滿肉香，比普通辣醬有質感得多，照叔話最適合用嚟炒海鮮。
搵食攻略
上環寶湖海鮮酒家（28549388）
地址：中環文咸東街35號文華大廈1至3樓
營業時間：6:30pm-11:30pm
交通：上環地鐵站A2出口步行2分鐘，每晚6:00pm免費代客泊車
座位：約640個，星期五至日午市最旺場
最好賣：脆皮葱油雞、鍋燒無錫骨、朱洪武豆腐
有着數：逢星期六、日及公眾假期，早、午市及下午茶一律半價（特價品、海鮮、酒水除外），星期一至五晚市免費提供卡拉OK廳房1間，先到先得
收費：12位用全包宴$1,498
