公民黨第一次打正旗號拉大隊7.1上街，籌到成十幾萬，成績理想，黨魁余大狀話查實善款多少唔係太重要，反而有機會同市民接觸先最爽。湯大狀收穫都唔少，因為佢本新書唔使一陣就賣晒，但湯大狀竟然有啲悶悶不樂，原來佢一早講好，會喺4點左右去到灣仔檔攤為新書簽名，點知佢4點半都仲未離開維園。
湯大狀點可以唔做啲嘢補償？佢決定咗喺7月19日書展開幕當日上晝11點至12點，喺會展搞簽名會。原來佢當晚就會飛去美國放假10天，咁趕都肯去簽名，湯大狀真係抵錫。
講開籌款成績彪炳，真係要多謝陳家洛。事關佢一路企喺街檔嗌咪，叫市民多多支持。佢三個囡囡都不遑多讓，一直陪住爹哋叫咪，可能係咁，陳家洛嗌咪都嗌得好開心，仲越叫越落力。