身為人大政協嘅汪明荃，前日一早就去到金紫荊廣場出席升旗禮同慶回歸酒會，會上佢好似花蝴蝶咁頻頻捉住啲高官同嘉賓合照，例如周一嶽、梁愛詩、霍震霆等等。
咪以為汪阿姐淨係掛住影相，其實佢亦都有趁機會為粵劇界做嘢，影相時不忘提醒班高官關注吓粵劇演出場地嘅問題。阿姐話，酒會當日佢好想親自同曾特首反映，可惜現場太多人，迫唔到埋去。
汪阿姐為粵劇界忙，周局長就為禁煙忙，八方聽聞，佢個局為咗想趕及喺呢個立法年度通過禁煙條例，日日不停配合啲議員開會，點知到咗最後，因為MildSeven個Mild字有誤導之嫌，要押後到下個立法年度繼續審議。
周局長梗係冇符，因為佢問過法律意見，話如果政府唔畀啲原有公司用Mild同Light註冊，會違反《基本法》第105條，但係馬丁就話唔會。全面控煙係好事，𠵱家分分鐘夜長夢多，唔怪得周局長笑唔出。