陳太7.1儼如微服出巡嘅女皇咁，受到圍觀市民歡呼吶喊。照咁睇，民意支持度都有番咁上下，絕對唔輸蝕畀煲呔；如果民主派喺選委會真係攞到100票，真係唔好放過陳太呢位猛將，至少可以嚇到煲呔，等佢唔好以為自己surewin，咁容易又可以玩多5年。
呢幾日，陳太都為7.1勞心勞力，係時間休息輕鬆吓。佢噚晚8點幾，就喺囡囡陳慧玲以及孫女陪同下，一齊去大會堂聽音樂會。一早話咗要走入群眾嘅陳太，噚日都喺麗嘉酒店行路去大會堂，冇坐私家車，證明佢都係普通人一個啫。
噚日陳太都有同記者講，遊行完係好攰，但都好興奮。梗係啦，5.8萬人喎，唔係少㗎，難怪陳太咁開心㗎。