大戶三兩下手勢，港股就上到初步反彈目標16200至16300區域，複式頭肩底形態以大成交（逾400億元）升破頸線來確認，呢個反彈前跌幅0.5倍的升勢，有晒勢，照計唔會係虛火，只要短期後市守得住16000大關之上，整固完成後，可向複式頭肩底的量度上升目標16800推進。
對沖基金無形之手好利害，大市升跌的速度同幅度，都遠比市場多數人所預期的來得誇張，有幾多人估到恒指一衝就衝上17300多點，而短短個多月，急挫成2000點，又有誰估得到？
無形之手唔會放手，後市一樣可以來多次升到你唔信，亦可以再跌鋪急嘅。大市中期調整到底，可能性已愈來愈大，但若16000大關守唔住，則唔排除大市會再試底，甚至行埋最後一跌，落到14200至14500水平。
中資股大強勢，完全冇疲態，唞一唞之後，又會再升過。內地房地產股大反攻，呢期彈得最勁嘅係中新集團（563），由低位0.495元衝上0.76元，升幅53%！
暫在0.7元水平整固
中新早輪大插水，由1.29元跌落嚟，跌幅逾60%（唔係公司有事），一到時機反彈，自然亦好急勁。內地房地產股受宏調影響，跌到過晒龍，反彈好正常，何況中新仲有大好消息，呢個浪應該仲有得再去。
中新現時在0.70元水平整固，形成旗形，再破位而上，目標就指向0.95元。
中新剛宣布收購天津龐大發展項目，斥資8.45億元，全部以發行12.43億新股，作價0.68元支付。
中新係近幾年轉型的房地產商，擁有的土儲都係名廈同靚地，大股東的人脈關係甚強，今次注入的天津項目係舊區旺地，比市價有35%的折讓，可建樓面面積近1200萬方呎，已開始分期動工，未來3年可提供可觀收益（每方呎賺100元，獲利已達12億元）。
中新05年度（4月年結）獲利1.4億元，06年度上半年已賺1.27億元，估計全年盈利2.5億元，PE只係個位數。未來幾年，北京、重慶、成都同天津的項目陸續完成，盈利穩步上升。
郭兆誠