英格蘭喺上周六又飲恨，互射12碼出局，相信唔少香港球迷都傷心欲絕，包括判官都好唔捨得佢哋提早畢業，但係我諗最傷心嗰個應該係林柏特！
世界球壇鐵人之一嘅林柏特，喺英超滿場飛，前後都玩晒，而且中長程距離施射腳腳七注，守衞見到都怕怕；點知喺今屆世盃，「林伯」唔止5場波都沒精打采，射門命中率更低得驚人，喺5場都打足每1分鐘，但佢起腳24次，只得11次中龍，更可憐嘅係，11次中龍都冇波入，濕滯！
長期征戰踢到殘
「林伯」可能係長期征戰所致，演出毫無信心，一係唔射，射親都高而遠，執波仔就多得佢唔少！上周六場波，「林伯」狀態有啲回升，但佢射門仍然話唔中就唔中，正當大家以為佢可以用互射12碼首次「破網」之際，佢就話畀人知「我唔得喇」！
英格蘭輸波，好多人插「林伯」，惟獨車仔領隊摩連奴護子心切話：「佢係世界盃上最好嘅球員」！「林伯」，畀心機啦！
判官話
唔理摩帥噏咩東東，明眼人都見到「林伯」真係捱唔住，所以𠵱家唔止車仔擔心，英格蘭仲擔心呀！
倒下指數：★★★★★
註：以5★為最高
專家話：既攻亦守顧此失彼
「林柏特的表現並不理想，主要因為踢法受到限制。林柏特在車路士時，踢法上比較自由，亦不用太過兼顧防守，但現在在英格蘭，既要攻亦要守，有點顧此失彼。」
網民反應：下次再嚟過啦
外界對林柏特有何評價呢？「林伯壓力好大，點解仲畀佢射12碼呀？」「林伯俾人捉晒路啦。」「一齊祝福英格蘭下次拎冠軍。」「邊個射，死邊個，認真邪門！」
世盃判官歡迎球迷來稿
世盃判官係1個在世界盃期間專為廣大球迷而設嘅欄目，球迷如對賽事有任何投訴、意見，想同我哋分享，就快啲投稿！來稿勿過300字。
世盃判官體育版電郵：[email protected]
體育版傳真熱線：23703534