畢竟香港人比較斯文，有時候，連聽個搖滾音樂會，都要靜靜哋坐喺梳化椅上欣賞，咁先算Enjoy。但音樂本身，亦可叫人抒發情緒、壓力，正如今日嘅靚女豆豆話齋，聽歌唔單止要放鬆，甚至加啲肢體語言、全身Fing嚟Fing去先夠放！睇住佢拎起BenQ部EF51手機聽歌嗰陣，形神如進入無人之境，連攝影師影咗相都仲未知，你話佢幾投入呢！
記者：陳國輝
攝影：林栢鈞
ImageGirl：豆豆
單睇BenQ呢部手機賣相，唔少人劈頭第一句：「乜成部CREATIVE部MP3咁嘅？」查實有幾似，大家心裏有數，真正令目光視線停留住，只係肚皮上嘅音樂控制面板，唔單止方便平時聽歌，個Look仲夠晒出位。喺方正簡約嘅外形以及單一顏色，兩者都極相似。連手機店老闆都信心爆棚咁話：「我哋返咗1黑1白兩部機，黑色嗰部可能似CREATIVE部ZEN啩，冇幾耐已經賣咗；加上呢部係台灣機，同香港一樣用繁體，唔驚走唔到貨嘅！」
最過癮嘅分唇之一，係機側除咗齊晒音量調校、相機快門掣之外，隔籬仲有1粒Speed-to-music掣，即係靠把口直接Call音樂出嚟，例如講「夕陽無限好」，部手機就識得播番首《夕陽無限好》出嚟，認真搞鬼！
3D立體聲拍住SE
自問唔係經常聽歌嗰種人，若然叫我拎住部MP3出街邊行邊聽，就一定冇可能。EF51屬於音樂類手機，雖然唔係我心目中那杯茶，但既然佢內置3D音效，又配備6種音場模式，試吓都冇壞！仲記得平時要戴住Hands-free先試得清楚，估唔到佢背面隻喇叭咁鬼好聲，音量仲好似SE機咁炸，扭到最大都唔覺得拆，當正迷你Hi-Fi仔玩，似乎唔係冇可能。
佢除咗播歌、搵歌之外，仲支援電話簿以及數字語音，玩起嚟仲快過人手㩒掣，認真方便！不過，今次EF51屬於台灣版，僅支援國語讀音，自問「賺果魚」能力有番咁上下，用落應該冇障礙！
影相取景睇到眼矇
如果MP3手機僅支援音樂播放，卻沒有內置相機分唇嘅話，似乎有啲過份！EF51總算合格過關，機背喇叭隔籬配置一個130萬像素鏡頭，只要㩒住快門掣幾秒，相機便自動打開，唔使揭蓋一樣玩到；但最煩人嘅係，屏幕闊度只有1.6"多少少，比現時講緊嘅2"標準嚟計，足足細1/5咁多，無疑當影相取景嗰時，玩得耐真係好容易眼矇。
小技巧
咪以為面蓋設計成MP3咁樣，就諗住齋用嚟播歌、揀歌外就冇特別用途！原來喺關蓋模式下，玩家一樣可操作手機Menu，例如更改操作模式、搵電話簿等；此外，呢幾粒音樂掣仲可以用嚟打機㖭，未玩過都唔知咁多花臣！
PROFILE
制式：GSM三頻
體積：89×49×18mm
重量：95g
屏幕：26萬色TFT
主要功能：Speech-to-music、專用音樂掣、音樂播放器、6種音場模式、FM收音機、內置20MB、miniSD卡槽、130萬像素相機
售賣點：華訊（23819022）