上周六嘅7.1遊行好曬，街邊賣凍飲一定好生意，但華叔就好犀利，天氣無論幾熱都好，佢次次參加遊行，無論係「六四」定7.1，佢中途都唔會飲水，費事搞到要去廁所。
華叔話，今年除咗普選之外，冇乜特別議題都有咁多人參加，真係好難得，佢仲撞到好多好耐冇見嘅熟人，今年冇特別話約邊個一齊嚟，佢一入維園見到教協支旗，咁就走埋去囉，同張文光一齊做帶隊。雖然華叔冇陳太風頭咁勁，但係都好多「粉絲」搵佢拍照。
至於加入咗公民黨嘅樂施會莊陳有前日都有上街。佢話，雖然自己睇唔到嘢，但都好想嚟感受氣氛，為爭普選打氣！八方好敬佩莊陳有，佢不但有理想，更加身體力行，好多人睇問題都唔及佢咁清晰。