每年美國奧斯卡嘅最佳外語片獎都備受關注，上年香港電影《如果．愛》就有份報名競逐，最終冇入圍。內地消息話，今年奧斯卡主辦機構美國電影科學和藝術學院宣布，出年奧斯卡最佳外語片會修改規則，其中報名名單由𠵱家嘅全球60部電影減至9部，然後由9部中選出5部，呢5部就係最終嘅提名名單。
「未收到通知」
由於報名名單減少，日後就唔可以香港推薦一部，內地又推薦一部，首當其衝受影響嘅正係今年9月上映嘅電影《夜宴》，之前一直話由馮小剛執導嘅《夜宴》會報名出年奧斯卡最佳外語片，如果依照呢個規例，《夜宴》好大機會連報名嘅資格都冇，咁樣會造成香港、內地或台灣都未必有電影報名競逐奧斯卡最佳外語片。
噚日馮仁昭致電香港影業協會理事長兼香港電影製片家協會主席洪祖星，佢話：「我未收到通知，因為每年我哋香港會由小組評選揀一部最好嘅電影，然後推薦去報名，如果佢改變機制就梗係有影響啦，因為得番九部，邊個國家可以報，邊啲國家唔可以報，都要等佢哋通知。」至於投資《夜宴》嘅寰亞電影公司負責人莊澄話：「《夜宴》可能會報名，但我哋未收到通知改機制，要收到先可以討論點處理。」