資深股票客戶謝太：Karen！你上個禮拜叫我唔好買股票，又叫我睇定啲，搞到我冇得賺。
年輕貌美經紀Karen：謝太唔好激氣住，今日可以買嘢啦，不過係買個市跌。股市要賺錢，就係股市參與者嘅共識同現實脫節。𠵱家好多人都覺得，美國聯儲局主席卒之覺悟，知道自己做緊乜，乜嘢都受到控制，利息亦加完，股市繼續炒。不過謝太我同你講個祕密，實際係佢知道自己想做乜，佢想立即停止加息，不過通脹數據差，所以要聽天由命。最弊就係美國樓市爆煲，好多人買咗樓供唔起，所以被人收樓，被迫租樓住。不過租盤供應有限，所以美國租金開始上升。
謝太：咁租金同加息有乜關係？唔通同通脹有關？
Karen：冇錯！聯儲局好注視嘅「通脹核心指數」有一半比重係用租金計算。信我，美國6、7、8月嘅數據都會好差。聯儲局一定會8月同埋９月再加息，個市死硬。仲有，日本中央銀行一定會繼續抽水，因為日本啲銀行唔需要再有零利率去支持，亦因零利率實在係太危險，通脹可能會唔受控制，遇着𠵱家日本政府又債台高築，一旦日本國民對日圓冇信心瘋狂拋售，日本央行就死啦。謝太買認沽證去搵大錢啦，呢個下半年會「好有趣」。