侍仔：世界盃後日凌晨就踢4強，大家到目前為止係賺定係蝕畀馬會先？
招積域：我同馬會係好兄弟，佢不時會過錢落我戶口度，所以我唔怕暫時蝕畀佢，因為正義喺我呢邊，我哋最終會戰勝馬會！
菠蘿文：你係咪輸到儍咗呀？我就賺少少啦，今屆成日開熱門，經常重注好似西班牙同巴西單W呢類大路嘢一定冇衰。
拿神：我賭得最狠就係分組賽時候，係咁買瑞典單W，但輸得好甘……好彩中咗對巴拉圭嗰場嘅波膽，之後我都收咗手啦，睇波唔賭波。
招積域：乜咁嘥料？4年一度就梗係要賭賭佢啦。好似我咁永不放棄，咪終於有回報囉，噚晚中咗英格蘭0:0串法國贏1:0嘅波膽2串3，即刻1次回本！一於4強鼓其餘勇，盡地一煲！
拿神：4強我就未做功課住，𠵱家仲替巴西唔抵！諗住可以報仇成功，但最後都係再輸多次，宿命就係宿命，真係14年來未贏過法國。
筷子毅：其實係巴西太緊張，成個中場俾法國搶晒，咁仲點樣踢呢？不過英格蘭嗰場我覺得幾驚訝，佢哋12碼只入得1球。
吹水傑：算啦，踢少個都冇失球，算係咁。不過最尾都唔換禾確特出嚟，我就有些少失望。
Rainie：我開始懷疑葡萄牙係咪鍾意踢少1個人呢？踢多1個佢好似唔識把握入球咁，呢隊波點樣可以再進一步呢？
文：高洛文