近排差唔多每日都要做eyemask，因為晚晚睇波囉。前幾晚同幾個friend睇，買咗幾罐啤酒，邊睇邊飲，朋友Chris顯得有啲心不在焉，就喺法國嘅施丹射入對西班牙最後一球波嗰陣，佢突然問咗個問題，全場靜咗一兩秒，之後先識大嗌：「好波！」\(^O^)/
「你哋覺唔覺得樽裝啤酒，好飲過罐裝呀？」我哋完場後就討論呢個問題。「係喎，我覺得樽裝可樂都係好飲過罐裝喎。」Terry咁話。呢個話題，同所有話題一樣，大家最終都無定論，都係講番場波。（施丹真係man！邊個話女仔唔鍾意睇波，而且仲比男人多一種樂趣㖭，就係睇男人囉。）(>^O^)>
我每事問嘅小宇宙第日就發揮作用，打畀嘉士伯啤酒同可口可樂公司，佢哋都話，無論樽裝定罐裝，飲品成份配方完全一樣；兩人都話，一般人覺得啤酒同汽水都係愈凍愈好飲，可口可樂嗰位小姐話：「唔知係咪因為樽裝多數喺食肆飲到，佢哋嘅雪櫃凍過一般家庭雪櫃啩。」
科大理學院副院長吳大琪有另一番見解。佢話，玻璃係絕緣體，相對於鋁，更加能夠保持樽內飲品嘅溫度，即係話玻璃樽嘅可樂或者啤酒，相對於鋁罐裝嘅，就算離開咗雪櫃，隔咗一段時間，仍然可以咁凍：「係咪因為咁好飲，就見仁見智。」
講係咁講，就算玻璃裝好飲，唔通真係買多啲返屋企咩，咁重，容乜易攞到我手瓜起𦟌，到時成個女泰山咁就死火。(O_o)
逢周一刊出